þe date a þousand was, þre hundred & seuen, [Mo. CCCo. VIIo.]
þe clergie for þat cas held þam more in euen.
AFTER þe Paske's wele þat þise men were þus schent, [Parliamen|tum apud arlele.]
þe kyng at Carlele held his parlement.
Fro Romc a Cardinalle þe pape þider sent,
To wite þe sothe alle þe mariage long of ment.
If þe prince mot haue þe kynge's douhter of France,
þe acorde & pes mot saue þorgh þat aliance,
& at þe parlement was a grete spekyng,
For þe clergic it ment of holy kirke's þing.
Erles & barons, ilkone it forsuore,
For what manere resons ȝit wot I no more,
Bot of þe last ende of þer grete counsaile,
To London suld þe sende men þat myght auaile,
To speke & purueie whilk suld ouer þe se,
þe sothe to Philip seie, & sette a certeynte
Of þat mariage, how & whan suld be,
& bate alle oþer outrage, for Gascoyn do feaute.
Of alle þe poyntes spoken þe parties bifore had said,
Neuer suld be broken on payne þer on was laid.
& whan þe parties wold mak a finalle pes,
God grante it þam to hold þe conant þat þei ches.
¶ ȝit gos kyng Robyn forth in his rioterie, [DeRoberto Brus, & morte Jo|hannis Waleis.]
Ne com not ȝit his fyn to ende of his folie.
Bot Sir Jon de Waleis taken was in a pleyn,
þorgh spiyng of Norreis, men þat were certeyn,
Fettred on a hakeney, & to London led,
To bring him sone on wey, þe justise þerto sped.
