þan bigan þe chace, & drof þe kyng Robyn,
To reste had he no space, long to duelle þer in.
¶ þe Freselle þer he fled, sone after was he fonden, [Capcio Sy|monis Fre|selle.]
Now taken he is & led vnto þe toure of Lundon,
þer his dome he feyng als traytoure salle ȝe witen,
First drawen & siþen heyng, & his hede of smyten.
Allas! it was to mene, his vertuz & his pruesse
So fele in him were sene, þat perist for falsnesse.
His hede vnto þe brigge to sette was it sent,
þe body lete þei ligge, & som þerof þei brent.
HERE now þe grete despite, & þe vilenie, [Capcio cleriScociæ, & missi sunt ad Angli|am super hakeneis.]
þat to þer bak gan bite of Scotlond þe clergie.
þe bisshop of Saynt Andrew, & þe abbot of Scone,
þe bisshop of Glascow, þise were taken sone.
Fettred on hakneis, to Inlond ere þei sent,
On sere stedis it seis, to prison mad present.
Lewed men & clerkis, þat did werre mayntene,
Als theues bere þei merkis, hanged alle bidene.
Cristofore of Seton many man him sauh
Hanged for treson of Jon of Badenauh,
Hanged als þe Freselle, & in þe same stede,
þe erle of Ascetelle þei bed þe same bede.
Saue he was not drawen, þat poynt was forgyuen.
Bot alle with schame slawen, þorgh treson þerto dryuen.
Allas! þat jentille blode com to so ille fyne,
& alle for falsnes ȝode to scheme's dede & pyne.
& wele I vnderstode, þat þe kynȝ Robyn
Has dronken of þat blode þe drink of Dan Waryn.
