Bot als a propire þing, þat were conquest tille him.
Whan þei brouht þat tiþing, Edward was fulle grim,
& bitauht him þe fende, als his traytoure in lond,
& euer ilkon his frende, þat him susteynd or fond.
þre hundreth marke he hette vnto his warisoun,
þat with him so mette, or bring his hede to toun.
Now flies William Waleis, of pes nouht he spedis,
In mores & mareis with robberie him fedes.
HERE now how þei sped, þe Scottis in his mercie, [De Symone Freselle.]
þe Freselle first fled, out taken on þer partie.
Tuo ȝere out of Kith, in strange reame suld be,
þe þrid suld he haf grith, ageyn to haf his fe,
þe toþer alle suld haue boþe lif & lymmes,
& þer tenement saue, bot raunson of þam nunn es.
Raunson suld þei gyue after þer folie,
& in his pes to lyue, & haf þer manauntie.
Siþen in þe Lenten tide he went to Saynt Andrew,
About on ilk a side, did crie his pes alle new.
þe bisshop of Glascow þe clergie alle out ches,
þe best men & trew, & com vnto þe pes.
þe kyng was so curteis, he granted þam þer wille,
Saue þe amendes he sais raunson for þer ille,
& suld be bot right bifor þe baronie,
& at þe comon sight of alle þer clergie.
