þe tounes, þe countes, þe foreyns alle aboute,
To þe kyng felle on knes, his powere did þam loute,
Un to his pes þam ȝald, feaute did him suere,
Treuly with him to hald, non armes ageyn him bere.
¶ Be þat þe werre was ent wynter was þer ȝare,
To Dounfermelyn he went, for rest wild he þare.
For þe quene he sent, & scho did dight hire chare,
Fro Cawod scho glent, to Dounefermelyn to fare.
þe lord of Badenauh, Freselle & Waleis
Lyued at theues lauh, euer robband alle weis.
þei had no sustenance, þe werre to mayntene,
Bot skulked opon chance, & robbed ay bituene.
þei com vnto þe kyng, for pes if it mot tide,
Opon þer askyng, he iorned þam to bide.
Men bred for þat iorne, þei suld haf had þe pes,
For eft þan suld men se, bigyn alle new þe res.
IN þat ȝere it sais, þe pape had grete despite [De contro|versia inter papam & Columpnos.]
þorgh þe [See Platina de vitis Pontifi|cum Rom. p. 231. Col. Agrip. M.DC.XXVI. See likewise Lassels's Voyage of Italy, Part I. p. 246. Paris 1670. Ed. 2d.] Columpneis, Cardinalles of habite.
þei were born in Rome alle þe Columpneis,
þat kynde bare þe blome, riche men & curteis.
Men said alle þat kynde had whilom þe dignite,
If clerke of þam myght fynde, pape suld he be.
þus þan was þe sawe whilom in þat cite,
þe pape fordid þat lawe, þe skille can I not se.
