Confused þei went away þat fals companie,
þei failed of þer pray, to hauen gan þei hie,
& hired þam a schip, gaf siluere largelie,
To Scotlond gan þei skip, þe wynde was þam redie.
EDWARD vnderstode, þorgh oft heryng say,
How þe fals blode compassed tene & tray.
He mad his pilgrimage to Saynt Thomas of Kent,
Siþen North on his viage to Beuerley he went,
Bifor Saynt Jon he woke a nyght or he þien nam, [ [Sic.] Perigrina|tus est Rex.]
To ȝork þe gate he toke, & souht Saynt William.
Saynt Cutbert he souht, to help him at his nede,
Siþen he dred him nouht, Northward als he ȝede.
Northward in his weie he held his parlement,
To speke & to purueie to be of on assent,
To Scotlond forto go, to take vengement
Of þam his folk did slo, destroied his tenement,
& how þei were alle lorn, þat com to þat couent.
For þei were forsuorn, vengeance on þam went.
þe date was a þousand, þre hundred alle bot one, [Mo. CCo. [Sic.] LXXXIXo.]
At Foukirke in Scotlond, Scottis escapid none. [Bellum apud Fau|kirk.]
ON þe Maudeleyn day, a litelle bifor Lammesse,,
Of Scotlond & Galway com mykelle folk alle fresse,
Of þe Marche & þe ildes, a spere þei suld bring,
þei com þe lond to schilde, to Faukirke in þe mornyng.
Our Inglis men & þei þer togidere mette,
þer formast conrey, þer bakkis togidere sette,
