¶ To while pape Boniface duellid opon þis, [Rediit in Angliam, & incarce|ratis Scottis dedit licen|ciam & li|bertatem exeundi.]
To gyue dome þorgh grace, to mende boþe þer mys,
þe kyng tok his consaile, & home to Ingland went.
Gode wynde in his saile Jhesu Criste him lent.
þe erles of Scotlond þat atteynt wer of treson,
þe kyng him self willand, deliuerd þam fro prison.
þise wer of þer gest, as I kan names fynde,
þe erle of Menetest was of Edward kynde,
þe erle of Ascetelle, Sir Jon þe Comyn,
Badenauh sonne I telle, & þretty of þer couyn,
Alle þise & wele mo atteynt of traytorie,
þe kyng lete þam go of his curteisie,
Withouten siluere or golde, or any oþer treuage,
þer penance was, þei suld go in pilgrimage.
¶ Here of þis wikked hals, þat our kyng gaf leue,
To France þei ȝede þo fals, to Philip wild þei cheue,
Bisouht him of socoure & auancement,
To maynten þam in stoure, þei mad [There is a little stroke over the i in the MS. which shews that him is to be read.] hir þer present,
Scotlond of him to hold euer withouten ende,
If he in luf wold as lord vnto þam lende.
PHILIP gaf respons, & bad þam go þer way, [Ecce de falsitate Scottorum.]
"ȝe ere foles Bretons, disceit is þat ȝe say.
"þe pape me defendes with bulle þat bindis hard,
"To renne on þo landes, þat longes tille Edward.
"To whils þat oure trewe duellis on jugement,
"For me salle neuer be newe no fals compassement.
