At þe kirke of Saynt Petir þe day of Saynt Agnes,
þe bisshop on his mitere of Carlele it says.
He stode vp in pulpite, þe office forto do,
þer Chartre he red it bituex þe erles tuo,
& cursed alle þo, þat þe Chartre brak,
Or stroied or did ouht fro ony poynt þer in spak.
After þis sentence gyuen, tille armes alle þat myght,
Was it no lenger dryuen, to Scotlond alle þam dight.
In alle Northumberland, þer þe Waleis had bene,
Alle was in þe kynge's hand, þe Scottis wer non sene.
IN alle þis nesch & hard, euer lasted þe distance
Bituex kyng Edward, & þe kyng of France,
Bot it was delaied tille a day certeyn
Of right dome set & saied, how pes mot be pleyn.
þei consentid boþe, þorgh conseil of þe pape,
To pese þam tuo wroþe, with sight he wild schape.
þorgh mariages was hopyng of þe pes,
þat were certeyn stages, þat boþe parties ches.
þe kyng on suld haue, a may was in spekyng,
Tille his sonne suld men saue, Philip douhter ȝing.
IN alle þis ordenance our kyng sent messengers [Rex misit nuncios ad Romam.]
þat [Pro, knewe.] kewe þe greuance, wyse men barons pers,
Unto þe courte of Rome, þe pape to schew þat cas,
How wondere chances come, & who did most trespas,
Of Inglis & Frankis who was most culpable,
In þe pape leues alle þis, to mak mende & mak alle stable.
