Sir Jon þorgh þam brast, bifore ȝe herd me neuen,
Was taken at þe last & his knyghtes elleuen,
& of his squierie gentille men auhtene.
þer pride & þer folie, I trowe, on þam was sene.
BOSTE & deignouse pride & ille avisement
Mishapnes oftentide, & dos many be schent.
þe proude kyng Pharaon, þat chaced Israel, [Exempla viciorum, quibus gra|tia extin|guitur.]
Dronkeld euerilkon, & Gode's folk went wel.
Sodom & Gomor fulle vile synne þat stank,
Boþe for euer more doun tille helle þei sank.
Dauid þat simple was, slouh he grete Golie,
Jacob sonne Judas solde Josep for envie.
Lucius þe emperour was slayn for couetise,
Arthur had dishonour for wronges many wise.
Modred a fole aperte was slayn licherie,
Cadwaldre for pouerte fled fro Bretanie.
Harald þis lond les, for he was forsuoren,
Leulyn brak þe pes, his hede he lost þerforn.
Allas! non with oþer chastised ȝit wille be,
Edward do turne þe roþer, & fare ouer þe se,
& socoure þo þat are ȝit in Gascoyn left,
Ne late þam not misfare, ne þer powere be reft.
[Et Thomas de Kent, e Jon de Beuerlye, Et Cuth|bert de Dureme te vendrount en aye. MSS. Gall.] Saynt Thomas salle be þi help & þi socoure,
St. Jon of Beuerle, Cutbert þe confessoure.
Bot þou haf help of God þorgh praiere of som Saynt,
I telle not worþe a cod, for alle þi faire is faynt.
