"& holy kirke defende, saue it & vs fro schame.
þe bisshop of ȝork so kende, & wild do þat same,
He granted for to gyue þe fifte penie to þe kyng,
In his werre wele to lyue, & saue þer oþer þing.
IN alle þis grete gram of þe clergi & þe kyng, [Venerunt nuncii co|mitis Flan|driæ ad Regem.]
Of Flandres þe erle William sent him a tiþing,
þorgh his conseilers & sauhtillyng wild he schewe,
With þre lordes pers of Blankmonte & of [Ken Codd. Gall.] Kewe,
þe þrid messengere a lord of grete honoure,
þat was þe tresorere of Flandres resceyuoure.
Of Hanaud þe erle first bigan, & alle his Henners,
þe duke Jon of Braban with þe Holanders,
þise praied þe erle William, for þer aller sake,
þat þei tille Edward nam þe aliance to make.
þise sent þis men & said, "þat þer conseile so ches,
"þei wild tille vs be laid, in gode lufe & pes,
"þat our merchantz mot go forto bie & selle,
"With luf withouten wo, & at ȝour hauens duelle.
"If he wild ageyn France reise werre & baners,
"þe Flemmynges wild þat chance to be his souders,
"Ageyn kyng Philip & his duze pers,
"þat with wrong wild skip, & reue him þo maners,
"þat þe kyng [Pro, Arthur.] Arthu gaf Sir Beduers,
"In Gascoyn alle þoru to his botlers,
"þe whilk kyng Henry, & now his sonne Edward,
"His ancestres holy haf had it afterward.
