þise wer in his wardes, & auht & tuenti mo,
Tuo clerkes tuo Pikardes ȝit were among þo.
¶ To þe toure of London þe þre erles were sent,
& þe barons bondon also þider went.
Tille oþer castels about þei sent tueye & tueye
In anens for doute, ilk on on his hakneye.
In kartes oþer were sent with anens on þer fete.
þus in sorow it ent, þer gamen turned to grete.
þorgh out Inglond men said of þam schame,
& þer þei were in bond men scorned þam bi name.
¶ þe Scottis [See my Glossary to Robert of Gloucester's Chronicle, p. 737.] I telle for sottis, & wrecchis vnwar, [Couwe.]
Unsele dyntis to dele þam drouh to Dunbar.
NOW is tyme to telle of þe duze pers,
þat in Scotlond duelle, wille mak þer parti fers.
ȝit held þe kyng of France Gascoyn with outrage,
For þat mischance of Blanche mariage.
For þat abatement he chalenges it þorgh right,
Edward þidir had sent many a hardy knyght,
þat while þei were werand in Gascoyn euer ilkon,
þe clergi of Scotland egged þer kyng Jon. [De Clero Scociæ.]
His barons did also for þe comon prow,
To France suld he go þe bisshop of S. Androw,
þer nedes forto mone, to procure an aliance
Of þe Baliol sonne, & Charles douhter of France.
& if it myght, þat weys he brouht to certeynte,
þe Scottis & Franceys togider suorn suld be,
