"To morn in þe none tide, whan þei ere at þe mete,
"þider ȝe alle salle ride, a faire pray salle ȝe gete.
"Whan þei of þe castelle se, þat ȝe com so stoute,
"þat ere of wille fulle fre, to issue on þam oute.
"þe Inglis wille not wene, þat ȝe be comand now,
"Of þo ȝe salle mak clene, lap þam bituex ȝow,
"þat þei neuer eft rise, to do ȝow more trauaile,
"I knowe non oþerwise, what way may ȝow auale.
"Armes now ȝow alle, þat non him withdrawe.
"How it may best falle, I haf ȝow said þe sawe.
¶ "Whan ȝe haf þe pris of ȝour enmys, non salle ȝe saue, [Couwe.]
"Smyte with suerd in hand, alle Northumberland with right salle ȝe haue,
"& Inglond ȝit alle, for werre salle be tint for þis drede.
"Scotte neuer bigan vnto Inglis man to do so douhty dede.
"þer on þat grene, þat kynrede kene, gadred als þe gayte,
"Right, als I wene, on som was it sene, þer þe bit bayte.
FOR þis manne's sawe, þe route of rascaile,
Tille armes gan drawe, & dight þam to bataile.
Richard þat first gaf rede to þat consaile, [De multi|tudine Scot|torum ad bellum præparan|cium, & de ruina eorumapud Dunbar.]
He sauh þam rif & raf comand ilka taile.
Also suiþe he ȝede doun to þe Inglis men,
"I se an oste to spede comand bi batailes ten,
"& ȝit me þink þer mo, þat er neghand nehi.
"If ȝe wille I wille go, & do þam hold o drehi.
"Nay," said þe Inglis men, "we trost not on þi tunge,
"þe castelle we salle biken Sir Umfrey Boun þe ȝonȝe,
