WHAT did kyng Philip, whan alle þis was ent?
To Paris gan he skip, & held his parlement,
& Charles his broþer with him com he þidere,
þe erle of Artous þe toþer, þre fals men togidere.
þise þre ageyn Edward mad a compassement,
For Normand & Pikard to courte after þam sent. [De tradi|tione Ka|roli & co|mitis de Artous.]
þo þat were in þe bataile, þat on þe had lorn,
þat portes gan assaile, as I told biforn,
Edward þei cald & teld, þat he was mayntenoure,
þe robbed he alle held, as a resceyuour.
Of suilk felonie Edward in courte þe cald,
Did non þat curteisie, þat þer for him wild hald.
Of þat fals controueyng gaf þei jugement,
Depriued þei our kyng of alle þe tenement
Of londes of Gascoyn, þat neuer more suld he,
For no maner essoyn, eft chalange þat fe,
Bot of þe kyng of France holden suld it be.
Edward kepe þi chance, þei haf bitraised þe.
MEN sais in þe courte of France, among þe deze pers, [De curia Franciæ & jure ejus.]
With right he leses his chance, þorgh faut þat not apers.
þer may ne write be brouht, to wynne ageyn his right,
Bot þorgh force be souht, þorght dynt of suerd & fight.
Edward sore it ment, whan he wist þat tirpeil,
For Sir Antoyn he sent, to com to his conseil,
& for þo barouns, þat were his wele willand,
For conseil & resons, & chance þat was comand.
