Fro Rome hiderward fayrer non was,
Enamoured bicom Edward of dame Blanche, allas!
Blanche did write stille, a letter Philip sent,
Hir herte & hir wille alle wist he what scho went.
A þousand &. cc. fourscore & fourtene,
ȝit salle Edward be encombred þorgh dame Blanche schene.
OFT þad þe parties spoken of þis mariage, [Forma ma|ritagii inter Edwardum & Blan|chiam.]
& teld boþe þer avis to messengers of passage.
Philip & dame Blanche granted þe aliance,
No þe les of a branche þer was a disceyuance.
How þe granted þer tille þei tald bi a messengere,
þe fourme of þer skille þei said on þis manere.
"Edward withut essoyn salle gyue Philip þe kyng
"Alle holy Gascoyn, withouten disturblyng.
"After þe forty dayes of þat feffement,
"Philip, without delayes, salle gyue þat ilk tenement
"Tille Edward & tille Blanche, & þer heires of þam comen.
"If it be so no branche in wedlaike of þam be nomen,
"If Blanche ouer lyue Edward, scho salle haf hir lyue
" [Sic.] Goscoyn afterward, ageyn þat non salle stryue;
"& after Blanche desces, withouten gaynsaying,
"Salle turne to þe heires in pes of þe Inglis kyng,
To þat ilk scrite Edward set his seale,
þat his gift was perfite, & with witnes leale.
Whan alle was spoken, wist not Sir Antoyn,
Fulle sone it had bien broken, & Philip fro Gascoyn,
Philip seysed Burdews, þorgh Sir Edward scrite,
þe toþer, as so say deus! ȝald þam also tite.
