"With alle þe purtenance þertille,
"þat to þe reame longes with skille,
"þe whilk I hold, & salle þorgh right
"Clayme to hald, at alle my myght,
"Heritagelik of þe,
"& of þin heires þat after þe be.
Of Inglond, with lif & lymme,
For erthly worschip þat I nymme,
Ageyn alle þo may lyue & deye,
& with þam hold in luf & eye.
ON þis maner þe kyng it toke,
His right forto saue & loke.
þis was at þe Newe castelle,
On Saynt Steuen's day it felle.
A þousand. CCo. fourscore & þre [Mo. CCo. LXXXIIIo.]
þe ȝers o Jhesu wer, whan þis felle to be.
OUR kyng gode Edward þorgh Scotlond ferd,
As he com [L. homward.] howard he souht S. Cutberd,
& mad þer his offryng, siþen com to Beuerlay,
& offred þer fair þing, to London his way.
