Of Inglond suld þei hold þorgh right & skille,
[L. to.] Fo wild þe feffementes ald, & þei granted þertille.
þis was certified, & sikere on ilk side.
It myght not be denied, for þing þat mot betide.
þis conseild Sir Antoyn, þe bisshop of Durham, [Ecce mur|mur factum pro rege Scottorum.]
þat non eft mad essoyn, þe kynge's right to clame.
NOW wex þe Scottes wode, now haue þei nythe & onde,
Who of þat fals blode ouh to be kyng of þe londe.
þat was right heire is dede, on þat side is no mo,
þorgh blode & right rede to Dauid salle it go.
Dauid of Huntyngton was kynge's Wiliam broþer,
Tille his heires þorgh reson, of William is non oþer.
Of William now is non, Dauid heire salle be,
& his heirs of him gon salle haf þe regalte.
Dauid had douhtres þre were gyuen to þre lordynges,
þat claymes þe regalte, Baliol, Brus, Hastynges.
þis ilk þre barons, þorgh descent of blode,
Haf right & resons to þe coroune fulle gode.
þise þre ȝald þer right vp to Sir Edward,
Tille it wer atried þorgh sight, whom it felle afterward.
Sir Edward is seised in Scotland ilk a dele,
þise þre barons pesid, & hold þam paied wele.
¶ Now com þis barons eft, & ask jugement, [Ecce Angli & Scotti tractant pro regno Scociæ]
To whom it salle be left, þorgh comon assent.
þe kyng wille bot wele, þe lawe alle vnderstandes,
þe hie folk ilk a dele, he did com of boþe þe landes
Scottis & Inglis, he said to þe wisest,
"Gyue now gode dome of þis, whilk of þise may best
