þider bihoued him nede, to set þat lond in pes,
For foles haf no drede, þat long is justiseles.
A þousand & tuo hundred, & fourscore ȝere & sex, [Mo. CCo. LXXX. VIo.]
On Wales many on wundred, for more wo ȝit þer wex.
EDWARD wele has sped of alle þing þat has bien, [Iter [Sic.] ari|puit versus Gasconiam.]
Tille Gascoyn with him led dame Helianore our quene.
þe gode erle of Cornwaile þis lond had in kepyng,
In luf & pes sanz faile went Edward our kyng,
& spak with þe kyng of France at Paris as he went.
þan felle a fair chance, þei wer at on assent.
Forth he gan him hie, tille Gascoyn is he comen,
þe rightes he did attrie of þo þat wrong had nomen.
Rightfulle dome he gaf on foles for þer misdede,
No man be ouerhaf, bot alle þorgh lawe ȝede.
¶ Towhile Sir Edward gos to Gascoyn forto apese, [Ecce de Reseamira|duk.]
Wales to werre vp ros, þorgh conseile of a Rese.
On [Rees amereduke, vel Res admyraduck, in Codd. Gall.] Reseamiraduk, of Wales a lordyng,
Our Inglis did rebuk, & werred on our kyng.
I kan not telle ȝow whi þat werre was reised olofte,
Men said þe wrath & cri com þorgh þe lord Tiptofte.
¶ þe kyng herd þat pleynt, vnto þe Rese he sent
A letter enselid fulle quaynt, for þe pes it ment.
He praied to hold him stille, tille his tocome mot be,
& he suld do his wille, in alle þat skille mot se.
His pleyntes he wild here in skille at lordes sight,
& if he baron were, he suld haf fulle gode right.
