A þousand & tuo hundred þe date fourscore & tuo,
On Leulyn has men wondred, no gynnes Dauid to thro.
FOR now bigynnes Dauid to wax a werreour, [Defalsitate Leulini & Dauid.]
With Leulyn gan he kith to be þe kynge's traytour.
þei mad a samenyng, & did als þei were wonne,
To disherite þe kyng, & his ȝongest sonne.
On his londes þei rais, & robbed ilk a toun,
Brent & slouh ilk man, his kastelle bette þei doun.
Sir Edward herd wele telle of his grete misdede,
þer power forto felle, it catchis him to spede.
He sent North & South after his baronage,
Sone it was fulle couth, þat Leulyn did outrage.
Atired þer wendyng toward þe Marche right sone.
Leulyn ageyn þe kyng & Dauid were alle bone,
To maynten forth þe werre, & susteyn þer treson;
þe entres did þei sperre, & hold þam in Snowdoun.
IN Wales it is fulle strong to werre in Wynter tide,
For Wynter is þer long, whan Somer is here in pride.
þat was to þam grete pyne, þat werryng vndertoke,
& Snowdoun did Leulyne wele to kepe & loke.
þe kyng knowe no side, how he mot com þer inne,
Nouþer go no ride, ne how he suld it wynne.
A water in Snowdoun rennes, Auber is the name,
An arme of þe se men kennes, þe depnes may non ame.
þe kyng controued þer ouer, a brigge forto make,
& of Leulyn to couere, Snowdoun forto take.
