þe kynge's side salle be þe hede & his name writen.
þe croyce side what cite it was in coyned & smyten.
þe pouere man ne þe preste þe peny prayses no þing.
Men gyf God þe lest, þe feffe him with a ferþing.
A þousand & tuo hundred & fourscore ȝeres mo, [Mo. CCmo. LXXXo.]
On þis mone men wondred [Sic, pro first.] fist whan it gan go.
WAS mad an oþer statute, þat non erle no baroun, [Quod terræ nec tene|menta de|bent vendi vel dari ad manum mortuam sine Regis licentia.]
No oþer lorde stoute, ne fraunkeleyn of toun,
Tille holy kirke salle gyue [Sic.] tenenement, rent no lond,
Fro þo þat now lyue in to þe dedis hond,
Without leue of þe kyng, or of his consaile.
þe encheson of þis þing may mykille auaile.
For freres of þe croice, & monk & chanoun,
Haf drawen in ovoice his feez to þer almoyn,
þorgh whilk drauht his seruise is lorn & laid doun,
þat is tille him & hise in disheritsoun.
Not for þi he wille, þat alle religioun
Haf & hold in skille þat gyuen is at resoun,
þe londes þat þei haue now in possessioun.
His seruise he wille now saue, þat non be þorgh tresoun.
Ne no baron so bold, to selle þam lond ne gyue.
For myght þei as þei wold, no man suld bi þam lyue;
Men here biforn haf gyuen þam out of skille.
It lies now waste & lorn, half may þei not tille.
