Edward wex fulle grim, whan he wist he was risen.
Sone he hasted him, to mak þam alle ogrisen.
þe Walssh wer alle day slayn, now rewes þam þer res,
& Leulyn is fulle fayn, to pray Edward for pes,
Gyues Edward for his trespas fifti þousand mark,
& þer tille bonden was with scrite & oth fulle stark,
To com tuys in þe ȝere vnto his parlement.
þe may on þis manere with Leulyn home scho went,
& held his heritage in pes as he did ore,
Mad was þe mariage at Snowdon biside Bangore.
IN [Le [an] secounde apres le encorounement, Le Reis a Wemonstere tynt son par|lement. E statuz fist fere par commune assent, Ke de We|monstere sunt dist propre|ment, Codd. Gall.] þe ȝere seconde after his corounment,
New statute þei fonde, to Westmynstere þei ment.
þe nex Paske folowand Edward sent his brefe
To Leulyn for his land, to com als tille his chefe.
Leulyn had despite of Edwarde's sonde,
Bot werred also tite on him with nyth & onde.
Edward raised scheld, after his men alle sent,
þat seruise of him held, manly tille him went,
& ran on Sir Leulyn, & alle his folk him with,
& maugre boþe his bryn was fayn to com to grith.
Dauid at þat while was with Edward þe kyng,
ȝit auanced he þat file vntille a faire þing.
To Frodesham with þe fe, & alle þat longed þer tille,
To Leulyn forgaf he alle his euelle wille.
