þe partis conseile hent, messengers þei ches,
Unto þe kyng þei sent, for a finalle pes.
At þe last right nede, pesed behoued it be,
So þat ilk man ȝede with pes to his cuntre.
EDWARD als so quik toward þe North him sped,
þe castelle of Alnewik he tok, & with him led
þe gode lord Vescy, þat was so trew a knyght,
To kepe þat seignory he tok tille on þat myght.
Sir Edward com to London, þer was his fader Henry.
On knes he felle to grounde, & praied for the Vescy.
þe kyng was fulle curteis, forgaf him ilk a dele,
þe lord of Kilyngworth als þat tyme sped wele.
His body did þe saue withouten prisoun,
His londes forto haue, he gaf þe kyng raunson.
¶ Right als þis werre was ent, & þe lond in state,
þe pape his bulle sent hider vnto þe legate,
& comanded him to preche þorgh alle þe lond,
þe Sarazins do grete wreche, þe Cristen for to schond.
Unto þe kyng of France was sent an oþer legate,
þat teld him of þat chance, whan Lowys herd of þat,
Himself þe first was croised on his flessh.
Forto wend þat pas, his wille was euer fressh.
Sir Henry of þis lond was þat ilk wille,
His sonne þer to him bond, his fader mot leue stille.
Sir Edward toke þe croice, for his fader to go,
Jhesu þou grant him voice, to venge him on þi fo.
A þousand tuo hundred mo, & sexti & ten, [Anno Mo. CCmo. LXXo.]
Sir Edward forto go he gadres him douhty men.
