¶ þe fift day it was after Lammesse tide, [De bello de Euesham per totum lege.]
& writen is in þat pas, at Euesham gan þei ride.
In þe alder next þat þe bataile was of Leaus,
þe gynnyng of heruest, as þe story scheawes,
Com Symon to feld, & þat was maugre his,
Or euer he lift his scheld, his wist it ȝed amys.
He was on his stede, displaied his banere,
He sauh þat treson ȝede, doun went his powere.
He sauh Sir Edward ride, batailed him ageyn,
Gloucestre þe toþer side, þan wist þe erle certeyn,
His side suld doun falle, tille his he said sone:
"God haf our saules alle, our dayes ere alle done,
Edward first in rode, & perced alle þe pres.
þo þat him abode þer lyues alle þei les.
He mad his fader quite of prison þer he lay,
Deliuerd him als tite with dynt of suerd þat day.
Hard was þat bataile, & ouer grete þe folie,
So scharply gan þai assaile, so mykille folk gan die.
Stoutly was þat stoure, long lastand þat fight,
þe day lost his coloure, & mirk was as þe nyght.
þe lif of many man þat ilk day was lorn,
þo þat it first bigan wrotherhaile wer þei born.
NOW is þe bataile smyten, Sir Symon is þer slayn,
His sonnes, als ȝe witen, died on þat playn.
His membres of þei schare, & bare þam to present
Sir Hugh Despenser, þare als he to dede went.
Sir Rauf þe gode Basset did þer his endyng,
Sir Pers of Mountfort fet his dede at þat samenyng.
