Bot whan þe kyng of France had knowen certeynly,
þat þe purueiance disherite kyng Henry,
He quassed it ilk dele þorgh jugement.
þe kyng was paied wele, & home to Inglond went.
Whan Sir Symon wist, þe dome ageyn þam gon,
His felonie forth thrist, samned his men ilkon,
Displaied his banere, lift vp his dragoun,
Sone salle ȝe here þe folie of Symoun.
THE erle did mak a chare at London þorgh gilery, [De bello apud Leaus.]
Himself þer in suld fare, & seke he wend to ly.
Sexti þousand of London armed men fulle stoute
To þe chare were fondon, to kepe it wele for doute.
þer þe bataile suld be, to Leaus þai gan þam alie,
þe kyng & his meyne were in þe priorie.
Symoun com to þe feld, & put vp his banere,
þe kyng schewed forth his scheld, his dragon fulle austere.
þe kyng said on hie, "Symon ieo vous defie;
Edward was hardie, þe Londres gan he ascrie.
He smote in alle þe route, & sesid him þe chare,
Disconfited alle aboute þe Londreis þat þer ware.
Edward wend wele haf fonden þe erle þer in,
Disceyued ilk a dele, he went & myght not wyn.
Towhille Sir Edward was aboute þe chare to take,
þe kynge's side, allas! Symoun did doun schake.
Unto þe kynge's partie Edward turned tite,
þan had þe erle þe maistrie, þe kyng was disconfite.
þe soth to say & chese, þe chare's gilerie
Did Sir Edward lese þat day þe maistrie.
