þei tok & sent þer sond after Sir Symoun.
þe Mountfort out of lond was, whan þis was don.
A message þei him sent, þe Mountfort son home cam,
þe barons with on assent to Sir Symon þei nam.
þei teld him þe processe of alle þer comon sawe,
& he as fole alle fresse fulle eth þer to to drawe.
Withouten his conseile, or þe kynge's wittyng,
To maynten þer tirpeile he suore ageyn þe kyng,
þe statute for to hold in werre & in pes,
þe poyntes þat þei him told, þerfor his life he les.
Hardely dar I say he did a perte folie,
Als wys men þis way, here ferst þe toþer partie.
SIR Symon was hastif, his sonnes & þe barons [De guerra inter regem & barones & de Mounfort.]
Sone þei reised strif, brent þe kynge's tounes,
& his castels tok, held þam in þer bandoun.
On his londes þei schok, & robbed vp & doun.
þo þat þer purueiance of Oxenford not held,
With scheld & with lance fend him in þe feld.
In alle þis barette þe kyng & Sir Symon
Tille a lokyng þam sette, of þe prince suld it be don.
An oth suore þei þare, to stand to þe ordinance,
Ouer þe se to fare bifor Philip of France,
At his dome suld it be, withoute refusyng.
þer for went ouer þe se Sir Henry our kyng.
þe quene wild not duelle, to þe kyng gan hir hie.
þus my boke gan telle, scho tok grete vilanie
Of þe Londreis alle, whan scho of London went.
Whi þat it suld falle I ne wote what it ment;
