He was a fole of lif, & vsed lichorie,
Both mayden & wif alle wild he ligge bie.
What did þe baronage & burgeis of Cite? [De Anglia interdicta & Rege ex|communi|cato.]
Distroied & did outrage of castelle, toun & fe.
About þei gan him chace, & hunted him als hayre,
Long had he no space to duelle no wele fare.
Many men of his kynde sauh him so abaued,
For him þei fauht with mynde, & oft so was he saued.
ALS þis wo was lastand in cursyng perilouse,
Kyng William of Scotland did his douhter spouse [De Rege Scottorum.]
To þe erle of Boloyn, & whan Jon it wist,
Withouten any essoyn, North alle gate him list.
Son he wan Berwik, a castelle he þouht to reise,
He cast þe ground walle þik, his folk he þouh þer eise.
William he þouht to greue, for þat grete despite,
þat he withouten leue, his douhter gaf marite.
Edenburgh & Rokesburgh vp þat he asked quite,
& his sonne Alisandere for ostage ȝeld him tite.
Bot þe kyng William alle þis ageynsaid,
In conaunt þat þei nam with pes alle was it laid.
¶ Of William has Jon þe pris, toward þe South he drouh,
& rennes on his enmys, & dos þam schame inouh,
& his enmys on him, & destroyed alle his fez, [De contu|melia regis & baro|num.]
Ilk one tille oþer were grim þorgh tounes and citez.
So þat holy kirke, & alle þe ordinez,
& bisshop wo he wike, & clerkes of dignitez:
þei rene þam prouendes, þorgh power þat þei haue,
& no man þam defendes, no wille þam help no saue.
