Boke þer was non fette, ne non þer after fore,
Hubert his croice doun sette, & William þeron suore.
þis is þe same Hubert, þat þe saw of nam,
þat trrnslate S. Gilbert in þe hous of Sempyngham.
NOW Hubert is dede our Sire, & to God is gon, [De morte Huberti, & electione conventus, & minaci|one Regis apud con|ventum & archiepi|scopum.]
þe Prioure of Canterbire sendes to kyng Jon,
Bisouht him of leue, to mak eleccion,
To chese þe suld cheue aman of gode renoun.
Jon wrote to þe couent, bisouht þam alle holyche,
þat þei wille make present to þe bisshop of Norwyche.
Of som he had grantise his wille forto do,
& som said oþerwise, þat it suld not be so.
Alle þe priour side þe suppriour þei ches,
Oþer for enuie & pride þe voice of many he les.
þe priour said, "þis day þe suppriour chese we,
þe toþer side said, "nay, þe kynge's praier salle be.
With him of Norwiche grete partie gan hald,
Wherfor boþe holyche to Rome þe parties cald.
Monkes fourtene with him of Norwyche held,
In a voice alle bidene vnto þe kyng þe teld,
& suore him in leaute, how so euer bitid,
Norwyche he suld be Ersbisshop sacrid.
þise monkes stoute & stark, to spede wele þei wend,
þe kyng þre hundreth mark gaf þam forto spend.
