Now has þe kyng wele sped, & comen ageyn to London,
& penies with him led, & spendyng has he fondon.
His barons alle aboute fast tille him drowe,
With hors & armes stoute, þer com tille him inowe.
R. wendes to schip, he wille no lenger duelle,
þe boste of kyng Philip fayn þan wild he felle.
ARIUED is R. at Depe in Normundie, [Transfreta|vit versus Normanni|am & Gas|coniam con|tra Regem Franciæ, & cepit Bur|rez & Gi|sors.]
He lay þer half a ȝere, estres to aspie.
& whan he sauh he myght, on his folk affie,
[Sa gwere fet ordiner, les dutres establye, Deuers A|quytaygne sa banere desplye, MSS. Gall.] His werre ordeynd & dight to þo þat couþe þam guye.
To Gascoyne þat he were fulle smertly he gan hie,
Cursels a castelle þere he wan with maistrie.
þe sergeanz þat it held wer in poynt to die,
To prison þei þam ȝeld, bot mercy gan þei crie.
ȝit he tok a pray, þorgh quayntise & spie,
Burrez he wan þat day, boþe hous & seignorie,
At þe dangu þat nyght he tok his herbegerie.
To Cursels Philip had tight with alle his companie,
He ne wist it ȝolden was, tille he com so nehi.
Whan he wist, he fled þat pas, to Gisors tok þe stie.
R. perceyued þis, þat Philip to Gisors fled,
He comanded his Inglis, þat after fast þei sped.
þei com Philip so nere, þat he cried, "tak þe kyng,"
Bot non so hardi were, to smyte him for no þing.
Me þouht kyng Philip inouh was disconfite,
Whan he & alle his trip for nouht fled so tite.
