NOW is þe oste Frankis tille Acres alle went,
& comen ere þe Inglis with pauilloun & tent,
& loged þam right wele ouer alle þer þam þink,
Inouh þei had catele, & plente mete & drynk.
Whan þei had alle eten, & watches mad alle preste,
To gete þat þei had geten, R. ȝede to reste.
¶ Orely on þe morn his messe he ȝede to here, [Ecce de|precacio Ricardi per totum.]
To Jhesu of Mary born þis was his prayere:
"Lord Jhesu," he said, "als so verrayly
"As my luf is on þe laid, & on þi moder Mary,
"Help me to venge þi dede of þis Sarazins kynd,
"þat gaf conseile & rede, þe to bete & bynd,
"& namly on þat blode, þat com of fals Pilate,
"þat wist sakles þou stode, whan he on þi dome sate.
"Jhesu for þin honour, if it be þi wille,
"I ask þe now socoure, my ȝernyng to fulfille.
RICHARD at Godesbord his messe had & his rightes, [Ecce quæ dicit Ri|cardus.]
Here now swilk a word he spak to his knyghtes:
"Of þis kyng Philip haf we no maner of help,
"Togidir I rede we kip, þat men of vs ȝelp.
"I vowe to Saynt Michael, & tille halwes þat are,
"þat for wo ne wele hiþen ne salle I fare,
"Ne tille Acres go, tille þe castelle be taken,
"þat Philip went fro, for vs has it forsaken.
"For his awen defaut with vs he has envie,
"Go we to þe assaut þat God vs alle condie.
¶ þe dikes were fulle wide þat closed þe castelle about, [De capci|one castri per Ricar|dum.]
& depe on ilk a side, with bankis hie without.
