Kyng R. þorght hatie after þe Erle sent,
& asked, "of what seignorie holdes þou lond & rent,
"þat þou has put out here þi baner for maistrie,
"Among kynges baneres, withouten auowrie?
"SIR, said þe duke, "I am now comen here,
"þise Sarazins to rebuke, & slo at my powere.
"My lond I hold with right, at no man's dome,
"Bot of God alle mygh, & Saynt Petir of Rome.
" [Sire duke, dist le Reis, par le fiz Marie, Si tu nas seygnour, ta tere ert altrye, Gallice.] If þou to non þat lyues," said R. "þou chene ne bowe,
"þi lond men salle gife tille one þat may it vowe.
Grete scathe afterward in a litille þrawe
Com tille kyng R. for þat envios sawe.
NOW haf þe Cristen won Acres þat was lorn, [De obsidi|one castri Pilgrim, & de remoci|one Phi|lippi.]
þe Sarazins ouer ron with force & doun born.
þe folk was mykelle & strong, of mete þei had grete nede,
þam burd departe þer þrong, þat lond mot þam not fede.
þei parted þe oste in tuo, þorgh comon acordance.
R. wille was so, so was Philip of France.
A castelle was þer biside fro Acres a jorne,
Grete scaþe it did bi tide to þe Cristen in þe cuntre.
þe castelle hight Pilgrym, of alle it bare þe flour:
þe Sarazins kept it þat tym for þer chefe warinstour.
