"þat my fadere Henry gaf to þe Holy lond.
"He toke it wikkedly out of þe Hospitelers hond.
"Fourti þousand pounde, & if he ȝelde it me,
"We salle fare & founde als frendes falle to be.
Sir Philip stille he stode, worde ne spak he more,
In þat same way þei gode, right als it was ore.
Richard asked þo landes, þat þe Cristen wan
Out of þe Sarazins handes, & chaced þe Soudan.
þe Sarazins wild not ȝelde so mony londes sere,
Ne þe kynge's ne wilde acorde in oþer manere.
OFT tille our Inglis men was schewed a mervaile grete,
A darte was schot to þem, bot non wist who it schete.
In þe schaft was purtreit, þorgh þe holy goste trowe I,
In nomine patris, it said, & filii & spiritus sancti. [Ecce mira|culum.]
Was neuer Cristen man couþe perceyue þe certeyn,
Ne wist what tyme no whan it passed out eft ageyn,
It com fro þat tureile, þat R. had doun smyten,
Alle þe Sarazins conseile in þe schaft was writen,
& alle þer ordinance, kyng R. it wiste,
It was a fulle faire chance schewed þorgh Jhesu Criste.
R. mad þankyng to Jhesu for þat sond,
& for þat schewyng to wirschip him suld he fond.
[A Phelipp & Richard les Sarecyns volaint Souent la cite rendre & bien promet|taynt, Ke la seinte tere Je|rusalem rendraynt, Et vint mille Cristiens qen prisoun auaint. Ne Phelipp ne Ri|chard de ceo se affyaynt, Mes de jour en altre al assalt a|laynt, in Codd. Gallicis.] TO Philip & Richard þe Sarazins said þei wild,
In a gode forward, þe toun to þam ȝeld.
