"& if þat we wille take a baron of ȝour oste,
"& Cristen kyng him make, to regne bi þis coste, [De pace tractata secundum formam in|ter Reges & Saracenos.]
"Him þan wille we say, who is moste valiant,
"If ȝe consent þat way, þe marchis of Mounfraunt.
RICHARD was hastif, & ansuerd þat stund,
"Certes þou lies cheitif, & as a stinkand hund,
"Here ere a þousand mo more worþi haf pris,
"þan he þou tellis fro, þat ilk traitoure marchis.
"It salle auaile him nouht, þat he ȝour Soudan sent.
"I se þat he has bouht þe lond with his present,
"& þis lond is oure, & our right wonyng,
"For oure ancessoure hereof was he kyng,
"& ȝe ere our enmys, þe Cristendam to spille,
"& now is þe marchis turned to ȝour wille.
"I rede out of þis oste þe marchis go his gate,
"Bi God þat myght has moste, he may go to late.
"If he þorgh traytorie salle be at ȝour deuys,
"I salle do him hang hie, or drawe with runcys.
SAID þe kyng of France, "R. whi art þou wroth,
"What is ȝour distance, þat he is þe so loth?
"& he is gentille knyght, of kynge's blode comen,
"If he with vnright ouht of þin haf nomen,
"He salle at þi wille mak alle þin amendes,
"& late alle be stille, þat þou him defendes.
¶ Said þe kyng R. "Sir, at ȝour honoure,
"In þat ilk forward he ȝelde me my tresoure,
