þe folk was alle pesed, to Statyn wild þei cheue.
Of Statyn þat was sesed Roberd toke his leue
With ricchesse inouh, þat he to Acres led,
& teld kyng R. how of alle þat he had sped,
"þe folk of Griffonie a monk þei chese to kyng,
"Sib Isaak a partie had mad a chalangyng.
"In Cipres wer þei comen, þer maistrie gan þei kiþe,
"& we ageyn þam nomen, & tok him als suiþe.
"To Cheryn we him led, & þer he brak prisoun.
"Eft we toke him fled, brouht him ageyn to toun,
"þe courte opon him sat, þe quest filed him & schent.
"For trespas of þat, he toke jugement.
"Allas! for vilenie," said R. þe kyng,
"þat a kyng suld so die, hanged for no þing!
"Roberd þou ert to blame, þou did ageyn resoun,
"Certes þou has don schame tille alle þat bere coroun.
"Sir," said Roberd, "þer of is not to speke;
"Late alle þis be sperd, on Gode's enmys þe wreke.
"Siþen Philip hider cam, he gaf neuer non assaut:
"It wer mykelle scham to mak suilk a defaut.
"A partie has þou sped, þanked be God alle myght;
"ȝit salle þou mak þam dred, or com a fourtenyght
"Do reise vp þin engyns, & wyn of þam þise dikes.
"I trowe þe Sarazins our comyng mislikes.
RICHARD als suiþe did reise his engyns, [Ricardus paravit se ad castel|lum.]
þe Inglis wer þan bliþe, Normans & Peteuyns.
In bargeis & galeis he set mylnes to go,
þe sailes, as men sais, som were blak & blo,
