With him forto duelle, to maynten þe pes,
þe foles forto felle, þat rise wild in res.
NOW leues Roberd with Statin nasee,
Tille tiþing be more herd, or pes better be,
With þe kynge's leue þe lond to justise,
His enmys to greue, þat ageyn him wild rise.
His wille has R. sped in Cipres fer & nere,
& Isaac forth is led with Jone & Berengere
At Triple to sojourne, & þer þei mad a crie,
Tille Acres forto turne alle holy þer nauie.
Bihynd left non of hise, bot alle with him þei nam,
Bot he þat was justise, Roberd of Thornham.
Now er alle on flote, God gif þam grace to spede,
With douhty fo to note, whan þei com to dede. [Ecce de navi in mari [Sic.] capto.]
AT none þe toþer day þei sauh fer in þe se
A grete busse & gay, fulle hie of saile was he.
þe weder was fulle soft, þe wynde held þam stille,
þe saile was hie o loft, þei had no wynde at wille.
In Philip nauie of France a pencelle þei put oute,
His armes on a lance ouer alle þe schip aboute.
So mykelle was þat barge, it myght not lightly saile,
& so heuy of charge, & þe wynde gan faile.
To wite what þei were went a marinere,
Respons þei gaf him þere, "þei were men of mistere,
"Fro Antioche were went vnto kyng Philip,
"& for vs has he sent, & his is þis schip.
