"It is my profit, to myn I wille þam holde.
þei went ageyn fulle tite, to kyng R. alle tolde.
WHAN kyng R. herde say ysaak respons,
"Turne we þiderward, & delyuer our prisons,
"& so it may betide, þei salle dere abie
"My þat þei hide, my men in prison lie.
Now he changes his weie, tille Acres may he nouht,
Many þerfore gon deie, I schrowe Isaak so wrouht.
It was Isaak to wite, tille Acres he com no nerre,
þe skaþe on him gan bite, þat R. turned þe werre.
¶ Whan Isaak had tiþand Emperour of Griffons,
þat R. drow to land with him alle his barons,
He did gadre an oste of Cipre & Griffonie,
& com vnto þat coste, to waite Richard nauie.
R. was perceyued, þei were renged redie,
& how þer pencels weyued, son he mad a crie:
"Arme we vs I rede, & go we hardilie, [De capci|one Cipriæ.]
"& we salle mak þam schede, & sondre a partie.
He was first þat stirte to lond out of þe boote,
Armed & suerd girte, bot an axe he smote.
With þat axe he hewe, þe Griffons mad him weie.
Many to dede he threwe, & to grounde doun leie.
His maryners gan vp riue about in stedes seere,
þe Griffons þei gan driue bifor þam alle plenere.
þe kyng Isaak fleih, his men had no foyson,
At þat tyme he ne deih, his partie ȝede doun.
R. cried on hie, "Londreis folowes me,
"Loke ȝe be me nehi, fulle gode giftes ȝete ȝe.
