Whan Philip tille Acres cam, litelle was his dede,
þe Romance sais grete skam, who so þat pas wille rede.
þe Romancer it sais, R. did mak a pele,
On kastelle wise alle wais, wrouht of tre fulle welle,
Ageyns holy kirke tille Aleyse forto drawe.
In schip he did it lede, to reise vp bi þe walle,
&, if him stode nede, to couere him with alle.
He reised it at Meschines, of werre tiþing he herd,
For þe ilde of Sarazins þer ȝates ageyn him sperd.
þe Romance of Richard sais, he wan þe toun.
His pele fro þat forward he cald it mate Griffoun.
Tancred he was wys, he did R. wille,
To Philip turned his vys, so þat he held him stille.
NOW is Philip on flete, kyng R. ȝit duellis,
Hes pele þat he vpsette eft ageyn it fellis.
For wrath first of Tancrede R. vp it reised,
If he had turned to nede, his folk forto haf eised.
Bot whan þei were mad frendes, þorgh sight baroun,
Tancred to him sendes, praied him take it doun;
þat no man for envie eft ageyn him held,
Ne þorgh non oþer harie to do him reise his schelde.
¶ Now purueies him Richard ilk a day alle preste, [De navibus periclitan|tibus in mari versus Cipriam, & Cancel|larius sub|incrsus est.]
Tille he be forward, he may haf no reste.
Acres þan is his triste, opon þe Sarazin feendes,
To venge Jhesu Criste þiderward he wendes.
þe kynge's sister Jone, & dame Berenger,
Formast of ilkone, next þam his Chanceler.
