A mayden childe it was, & now dede is it,
"þis wer agrete trespas, agayn myn owen inwitte,
"So febli forto wirke, for drede of Gode's awe,
"I Richard haf maugre, & I Aleyse take,
"Whan my fader & she suilk samenyng gan make.
¶ þan said kyng Philip tille alle þo of France,
"Of gile þis is a trip of Richard desceyuance,
"Gisors my gode cite, with alle þe purueiance,
"Richard I gaf it fre, to mak þis aliance
"Of him & hir þo tuo, þat er now in distance,
"Ten þousand mark & mo, þat now er in balance,
"& I betraised of alle, bi God, þat alle may auance,
"I salle bring him to stalle, bot he mak me acquitance.
"NOW," said kyng R. "þe manace late alle be,
"þou salle haf reward of Gisors þi cite; [Concordati sunt per barones.]
"þe tresore ilk a dele, þat þou me bitauht.
"For me salle haf wele alle þat þou euer auht.
þe barons suffred nouht þe kynges to be wroth.
Luf & pes þei souht, þat þei acorded both.
Richard ȝald him his right, his tresore & his toun,
þorgh witnes & sight, of clerk, erle & baroun,
His sistir forto marie, where God wild loke,
To mak certeyn partie, R. a quitance toke.
AFTER þe acord sone, Philip dight him forward,
To boote mad him bone, & toke leue at Richard.
þe wynde was in his saile, tille Acres gan him driue,
Bot litille was his trauaile, tille R. gan ariue.
