"We þre haf þe ward of God & our ladie,
"þe schippes of kyng Richard to kepe & ȝow þam bie.
After þis biheste, þat Thomas to þam said,
Sone alle þe tempest in a throwe was laid.
þise nine schippes gan ride þer wyld wynd þam driue,
þei ne wist to what side, ne what hauen in to riue.
AT Leons sur le Rone was Philip & Richard, [De Johan|na, sorore sua.]
þei spak & mad þer mone, what hauen þe mot toward.
In alle þe cuntre þorgh so grete folk mot men se,
þat nouþer cite ne burgh myght þei in herberd be.
Philip toward Gene his oste did alle go,
& Richard oste bidene at Marsille left alle þo.
¶ To mete on a while þe trompes blowe alle clere,
Batand fro Cezile com him a messengere,
Fro þe quene dam Jone, his awen sister dere.
Bifor þam euerilkone he told kyng Richere,
Dede is kyng William, þat regned in Cezile,
þat Jone þe lady nam, he lyued bot a while.
þat erle is of Tancre, Geffrey a douhty knyght,
& valiant man of dede, & to þe coroun has right,
He regnes after him, & late had þe coroune,
To Jone he is fulle grim, & haldes hir in prisoune.
Herfor kyng Richard wrathes him & sais,
"Dight vs þider ward our busses & galais,
"Mi sister I wille out wyn or I ferrer go.
"Bot he bigyn Cezile he turnes fro,
"& bot he wille with pes acorde in reson,
"It salle rewe him þat res, þat he to Jone has done.
