þei had in þer route a hundreth schippes & ten,
Bot God þei had no doute, ne no defaute of men.
ON þe fifte day changed þer wynde, [Ecce mira|culum & de maris periculo.]
Reft þam þe right way, to wend þe wer blynde.
þe right se of Bretayn, þer out were þei went,
In to þe se of Spayn wer dryuen in a torment
Among þe Sarazins, bot God, þat grace þam lent,
Saued þam alle þo tymes fro þer encumberment.
Ten schippes wer dryuen, þorgh ille auisement,
þorgh a tempest ryuen, þe schipmen held þam schent.
On þer was on depe kroken & alle to rent,
þe nien God gan kepe, þat grace he þam sent.
Eft God þei bisouht, to saue þam in þat cas,
Sauely to hauen be brouht, for luf of S. Thomas,
þat for holy kirke suffred martirdam,
& God for þam gan wirke, her how a voice cam.
A schip þer was of London, richely atired,
A hundreth þer in fondon, to serue God desired.
Biside þam on þer schip com a bisshop doun,
þe mast in hand gan kip, with croice & pallioun,
& a kyng þe sihi, of gold schone his coroun,
A noþer bisshop þam bi, þe first said his sermoun.
þan said þe Ersbisshop to Londreis wordes suete,
"I am Thomas ȝour hope, to whom ȝe crie & grete,
"Martir of Canterbire, ȝour bale salle I bete.
"Seynt Edmunde þe martire his help I ȝow hete,
"þe bisshop S. Nicholas, whos help is ay redie
"To schipmen in alle cas, whan þei on him crie.
