& þer he purueis him tille Acres & Sully. [Applicuit in Nor|manniam.]
On Gode's enmys grim he gadres gode party.
In þe cite of Rouhan his ȝole feste he held
With many douhty man, & knyghtes gode of scheld.
ÞE Monenday þat felle to be next after þe tuelft day,
þe kyng of France & he, at þe riuer of S. Rymay,
Held a parlement, gode sikernes to make,
þat boþe with on assent þe way suld vndertake.
Ilkon sikered oþer with scrite & seale þerby,
Togidere suore þam breþer, wherfor þe clergy
Gaf a grete cursyng on whilk of þam so brak,
Bigan a wikked þing, þat euelle bituex þam spak. [Modo pa|raverunt se ad terram sanctam.]
¶ Now is Philip certeyn, he gos to S. Deny,
& Richard turnes ageyn, to dight his nauy.
He serches ilk coste of alle his seignorie,
þe Guyours of his oste, þise wer withouten lie:
þe Ersebisshop of Anxus, danz Guard of renoun,
With anoþer bisshop, Bernard of Bayoun,
& Richard de Cameuile, & Roberd du Sabloun,
& William de Fortiz was lord of Oleroun,
þise gouerne þer nauie, now ere þei in þe se,
Toward þe paemie, þider þei ȝerned to be.
Richard said þam his wille, "mariners if ȝe moun,
"Aryues in to Marsille, with Gode's benisoun.
þis was þe first woke of þe passion,
As I on on boke gan loke, þe oste clerke & baron
Wer sailand in þe se toward Marsille þat toun.
Help þam þer þei wild be Criste & Say Simioun.
