He mad for alle þo landes, þat he of Inglond held,
& tille þe pes he standes, þat bowes tille his scheld,
ȝit of penyes rounde to Richard gan he bede
Sexti þousand pounde, to mende his misdede.
& Richard on þis wise forgaf it William so,
To saue þat seruise, þat Malcolme was wone to do
Unto þe Inglis kynges, as right was & skille,
& do alle þe comynges, whan bodword com þam tille,
To London forto com, whan parlement suld be,
Als custom was wonne, & tak þer his liuere.
& Richard als quik ȝald to kyng William
Rokesburgh & Berwik, þat he in his hand nam.
William tok his leue, his way to Scotland ches,
Wele mot William cheue, & alle þat lufes pes.
KYNG Richard ȝit duellis, & purueis him to fare, [Stabilivit justitiarios & custodes terræ.]
& mykelle þing sellis, siluer forto ȝare.
Wardans sette he stable, trewe men at his myght,
þat neuer lufed fable, bot mayntend pes & right.
Sire Huge of Durham, bisshop & man worþi:
An oþer Sir William, bisshop of Ely.
þise suld kepe þe lond, & þe dignites,
Justises tille þam he bond, to kepe þe lawes & feez;
Huge Bardolf fulle fers, William Marschalle his pere,
Geffrey le fitz Pers, William dela Bruere:
þise were mayntenours, to sustene þe coroun,
& rightfulle gouernours þe folk in feld & toun.
¶ Now has he brought to stalle, his lond stabled redy,
& now with his folk alle, he wendis to Normundy,
