ÞAN said Sir Henry, nedes burd him wende
To France & Normundie, to witte a certeyn ende.
At Parys wild he be, at þer parlement.
þer wille wald he se, to what þei wild consent.
At þe duzepers þe sothe wild he wite,
& on what maners, & wharto he suld lite,
& whedir þei wild to werre, or þei wild nouht,
Or alle in luf sperre þat þing þat þei had wrouht.
¶ He sauh wele bi signe, he drouh fast tille elde,
Long myght he not regne, ne on his lif belde.
Wherfor Henry said he wild, or he went,
þat þe summe wer laid of his testament.
Liste & I salle rede þe parcelles what amountes,
If any man in dede wille keste in a countes.
SEX þousand marke tille Acres did he fend.
Ageyn his comyng þidere, bi marchandz so he wend.
Fifty þousand marcs had he lent abbeis, [De testa|mento Hen|ricisecundi, facto apud Waltham, per totum.]
þat wer in pouerte, vp þam forto reise.
Alle þat was gyuen, & befor hand lent,
þat was not in cofre, whan he mad testament.
Of þat þat was in cofre, & in his cofines,
He mad his testament, als did oþer pilgrimes.
¶ To Waltham ȝede þe kyng, his testament to make,
& þus quathe he his þing, for his soule sake.
¶ To temples in Acres he quath fiue þousand marke,
& fiue thousand to þe hospitale, for þei were in karke.
¶ To þe folk þat duelled, Acres forto fende,
Oþer fiue þousand marke he gaf þam to spende.
