Contek in countes alle was peysed wele,
Baret of baron feez forgyuen ilkadele.
þan was Inglond in pes & charite,
& alle in Henry gracious kyng & fre.
In his nientend ȝere of his regalte, [De consilio & falsitate Franco|rum.]
Henry his sonne his pere was ȝit ouer þe se.
þe kyng sister of France Henry allied him to,
Here of a desceyuance þei conseild him to do.
þe erle Philip of Flandres gaf him in conseile,
& Thebald of Plesence egged to þat tirpeile,
Ageyn his fader to rise, þer he had no right:
þe kyng of France & hise hight him alle his myght.
WHAN þe fader wist þe sonne wild werre on him, [De remotu obsidionis per Henri|cum.]
I blame him not if him list turne ageyn fulle grim.
For þam of Scotland he sent William & Dauid his broþer,
Tille bliþely þei went, & with þam many oþer.
þe erle of Leycestre þe oste alle did he guye,
Of werre he was þer maistre, dight þam to Normundie.
¶ Whan þei were vp aryued, þei fond þer þar chance:
þat reame was biseged with þe power of France.
Henry chaced his sonne þorgh force fro toun to toun,
þe kyng of France eftsonne left tent & pauilloun.
Philip of Flandres fleih & turned sonne þe bak,
& Thebald nouht ne deih, schame of þam men spak.
Fro toun to toun of reme þe Frankis did þei fle,
Ouertok it to ȝeme, & saued þat cite.
