In alle maner of þing, þat Rauf felt him filed.
Bot here now how þe kyng Rauf þe erle begiled:
Unto Northampton Rauf to courte kam.
þe kyng, þorgh treson, Rauf þer he nam,
& held him tille he ȝald of Lyncolne þe castelle,
& plenerly haf he wald þe rentis þat þerto felle.
¶ þe tuelft ȝere of his regne at ȝole he held his feste
At Lyncolne, as in signe, þat it was his conqueste.
Sone after þat feste, þat he þer seysen tok,
þe courte, moste & leste, tille Arundelle þei schoke.
þat þe kyng was gone, Rauf herd sone say,
To Lyncoln forth on one Rauf þan tok his way,
& reised a mangnel, to kast vnto þe toure.
þe burgeis were fulle felle, þei ȝald him hard stoure.
þe Gyour of his oste at þat saut was slayn,
& Rauf, for alle his boste, fulle fast fled agayn.
THE ȝere next on hand ȝede þe kyng of France [Ecce kou|wardise magnatum & fuga eo|rum.]
To þe holy land, with his purueiance.
þe emperour with þo kynges went withouten grace.
þo & oþer lordynges mad þe grete manace,
Upon Gode's enmys forto tak vengeance.
þei sauh þe payens of pris of so grete purueiance,
þe Cristen turned for drede withouten dynt of lance.
Bot here how þe poraile spede, God gaf þam fair chance.
¶ þe poraile þat went þider, þat had no spendyng,
þei suore þer oth togider, to lette for no þing,
To wend vnto Spayn, & tuo Citez þei wan.
þe Sarazins was þer wayn, & slouh þam ilk a man.
