þe marschalle of þam alle, Helys of Saynt Omere,
To ded þan gon he falle doun of his destrere.
þe maistir of þer pedaile, þat kirkes brak & brent,
& abbeis gan assaile, monkes slouh & schent,
Was born in Pikardie, & his name Reyuere,
In suilk felonie gadred grete auere.
He had what he wild, & was of wendyng ȝare,
& had a schipe wele filled, ouer þe flode to fare.
þer in was wif & childe, & tresore wikly wonnen.
So com a tempest wilde, his schip had alle ouer ronnen.
þe maryner was ogast, þat schip þat wild not go.
Lotes did þei kast, for whom þei had þat wo.
þe lote felle on Reyuere, & on his wif also.
þris kast at tymes sere, selle it on þam tuo.
ÞE schip man wist wele, þe tempest þat þam smote,
For þam com ilk a dele, he did þan tak a bote,
& did þam alle þerin, Reyuer & his gode,
& whan þei were o tuyn, þer schip ferd on þe flode.
Reyuer & his wif doun tille helle þei sank,
For his wikked lif þe Deuelle gald him þat þank.
IN his tende ȝere a hatrex wex alle hote,
þe kyng fulle austere ageyn Sir Hugh Bigote.
þe kyng did not wele, with þe wrong he wrouht;
Amendes he mad som dele, bot of þe most right nought.
¶ Rauf þe erle of Chestre, & þe kyng were wroth,
In his elleuend ȝere, þe wend haf acorded both
