þe castelle of Bitham to Gilbert ȝolden was.
It longed to William, þat tyme felle him þat cas.
WILLIAM of Almarle þat tyme Northward rode,
. þe castelle of Hundmanby he cast doun alle o brode.
Sir Eustace le fitz Jon at þat dede was,
More him, þan ilkon, þe wited þat trespas.
Who so was wroþe, or oþer, biforn, for any chance,
His enmy þe toþere toke þan his vengeance.
þo þat lufed werryng mad parties ay bituen,
Som held with Steuen þe kyng, & som with Mald þe quene.
For erles & barons, þat were of Malde's kynde,
Souht citez & touns, þe kyng if þei mot fynde.
Hir frendes fulle fast waited aboute & woke,
& Mald at þe last kyng Steuen scho toke,
& led him to Bristow, & did him þer in hold,
In prison, I trowe, þorgh þe quene Mold.
[Des riches & des pouers de communalte Eft Malde leimperice dame rescen de gre. Gall.] þan þe riche & pouere, & alle comonly,
[F. fro.] For Berwik to Douere held hir for lady.
¶ Whan þe lond gan hir loute, & alle was at hir wille,
þan bare scho hir ouer stoute, & wild vnto no skille.
For or þat ȝere was gon, scho bare hir so stoute,
þat þe Lundreis ilkon of London drof hir oute.
Mald þorgh þe Lundreis fro London is katched,
With hors & herneis Bristow has scho latched.
