þise were þe barons, þat com of þe North ende,
þat Rauf mad somons ageyn Dauid to wende.
þise men lift þer standard, þat stoute was & grim,
Ageyn Dauid wandelard, & disconfite him.
SAID Rauf tille ilkon, or þei ta bataile went, [De Radul|pho de Orkneye, qui ductor fuit de bello. Hii sunt qui fuerunt in prœlio.]
"Of þe bisshop Thurston haf I comandment,
"þe clerkes forto tech, for þe londe's nede,
"þe lewed also to preche, & comforte þam to dede.
¶ "ȝe wite wele a remenant, & forsoth ȝe kenne,
"þat Inglis & Normant be now ons men.
"ȝour ancestres conquered all France quitely,
"Were þei neuer ferde of Frankis men hardy.
"Pople with alle þe recchesse, & akres, als þei wonnen,
"þorgh þer douhtinesse, þe lond þorgh þei ronnen.
"Siþen wan þei Inglond, þat is so plentynous,
"& now er þise bot mansbond, rascaile of refous.
"On ȝour fadres þink, þat were staworth in stoure.
"For þise ne salle ȝe blenk, bot hold vp þer honoure.
"Go we with gode wille, & here I ȝow assoyle,
"Of alle ȝour synnes ille granted of þe apostoyle,
"þat ȝe haf said or þouht, or don þat is schryuen,
"In Criste, þat vs alle bouht, be it ȝow forgyuen.
"þerto my benyson tille alle þat go bliþely,
"In þe name of þe fadere & þe sonne & sprit sancti.
DAUID of Scotland hasted to þe bataile,
Walter Spek ros on hand, þe folk to forme & taile.
