& gaf þam sonde at wille in Inglond forto fare,
Man & beste to spille, non ne suld þei spare.
Southward þe Scottis hasted, bifor þam bare alle doun,
Alle þe cuntre wasted vnto Aluertoun.
Whan þe kyng Dauid Aluerton had sene,
& wend wele at his grith alle Inglond had bene,
þe Norreis so þam defendid ageyn þo þat he brouht,
Whan Dauid alle had spendid, of þam wan he nouht.
Liste how Dauid les his spente & his trauaile,
& whilk on him gan pres, to renne on his rascaile.
THE archbisshop Thurstan, a gode clerk wele in age,
Herd þe Scottis com ilkan of Dauid baronage,
Forto destroie Inglond, & set it in seruage,
Thurstan sent his sond, tille a bissh sauuage,
Rauf of Orkeney, noble of lynage,
þat he suld tak þei wey, opon his kostage,
& do þe Scottis deie, & þer pride asuage.
Whan Rauf herd him so seie, he dight him to þat rage.
¶ þise were þo þat nam, als in þe geste it sais,
Of Almarle erle William, & Walter de Gounteis;
Roberd de Brus þer cam, & Gilbert de la Say,
& his sonne Adam, & Roger de Moubray.
Walter Spek was in·þat stoure, gode knight at alle nedes,
þe boke tellis grete honoure of his douhty dedes,
Of monkes & chanones he did mak abbeis,
Wis man in þe lawe knyght gode & curteis.
William Peuerelle com als, he was of þe West,
Ageyn þe Scottis fals, a gode man with þe best.
