AT Pask in London þe kyng his feste held,
With erle & baron, with knyght þat was of scheld.
Was non þat þider ȝode, þat holden was of pris,
þat he ne had gyftes gode of Steuen þat was wys.
After þis fest praised Steuen with alle his here,
þe castellis he seised, þat he hat neuer ere.
& Baudewyn of Beduere he flemed fro toun & felde,
A kestelle with powere ageyn þe kyng held,
þe kastelle tille him toke, Baudwyn had it lorn.
Here how þe kyng forsoke his oth þat he had suorn.
¶ In Huntyngtonschire þe kyng in þat forest [Perjuratus est Rex.]
A moneth lay, to spire for wod & wilde beste.
Forsters did somoun, enquered vp & doun,
Whilk men of toun had taken his venysoun,
& who þat was gilty þorgh þe foresters sawe,
Mercied was fulle hi, & don [F. in fulle.] & fulle grete awe.
þus he brak his avowe, þat he to God had suorn,
For a buske or a bowe þat he forgaf beforn.
OPON þis ilk syn to Normundie he went.
þo serganz he fond þerin, he exiled þam & schent,
þat had kept þe land þorgh Mald þe Emperice,
þat were hir wele willand were putt out of office.
Siþen he went to Fraunce, & com vnto Parys,
& þer acordance bituex him & Lowys,
& gaf it Eustace his sonne alle Normundie in fe,
To hold, as it was wonne, of Lowys for feaute.
þe kyng for his seruise confermed his gyft,
& on þis ilk wise Eustace to duke was lift.
