Ne costom no seruise of þing þat he forgaf,
þat noiþer he no hise suld chalange rif no raf.
Of som poyntes he spak, & suore vnto þe clergie.
þat ilk ȝere he it brak þe kyng in som partie.
WHAN wrathed Steuen with Dauid of Scotland,
þat wild not tille him cheuen, no bowe vnto his hand.
Dauid vnto Mald had mad his homage,
Steuen was in defaut, to Dauid did outrage.
Bot Henry Dauid sonne, þat his heyr suld be,
Contek for to schonne, to Steuen mad feaute.
Steuen sauh his skille, þat Henry did resoun,
With alle þat longed þer tille he gaf him Huntyngtoun.
Henry of Huntyngton he wrote þe gestes olde,
& sais in his sermon þat newe ere now tolde.
A bisshop of Lyncoln, Alisaundre he hight,
þat non suld be forholn, he praied him if he myght.
In Alisaundre tyme kam, & Henrie's þe compilour
Ros þe ordre of Sempyngham þorgh Gilbert þe confessour.
Saynt Margrete story sais Dauid of hir kam,
Of Dauid kyng Henry, of Henry com William,
Of William Alisandre, & Alisandre of him,
þat wedded kyng Edward sistir, þat was þe Scottis grim.
þis is þe Genelogie fro S. Margarete þe quene
Of kynges bi & bi in kynde þat has bene.
Now of Steuen to speke turne we eft ageyn,
Our tale wille we no breke, bot telle forth þe certeyn.
