Whan þe fader had ent alle at his auys,
To þe holy lond he went, & died on Gode's enmys.
HENRY his sonne & Molde, þat held þe seignorie,
A sonne þei had fulle bolde, & his name Henrie.
Siþen had þei a noþer, þat þei cald William,
þat was Henry broþer, boþe of Mald cam.
Hir fader þe kyng loued þo childre so,
þat he wild for no þing þe sight of þam forgo.
ÞE kyng went at the last vnto Normundie,
& praied his douhter fast, to bere him companie;
& hir sonnes boþe, Henry & William,
þei were him nere boþe, gladly with him þei nam.
Henry regned here þritty ȝere & fiue,
& þre moneþes sere, in þis feble lyue.
þe dede euele him toke, he died at his day,
þe body did þei loke, þat long abouen erþe lay.
On bere lay kyng Henry, on bere biȝond þe se,
þat non wist certeynly, who his heyr suld be.
Of Mald som had þe speyre, þe erle wif of Aniowe,
Hir sone Henry & heyre of him was maste to trowe.
So long he lay on bere, for doute of his lynage,
Tille men þe soth mot here, who suld haf þe heritage.
Els I ne wote for wham, his biriyng suld men schonne,
[De morte Henrici primi per totum.] Tille Steuen of Plesance cam, þat was his sister sonne.
Steuen com for þe nons, þis lond to haf he þouht.
After were Henry bones to Redynge's abbay brouht.
