Godfrey was oglift, to Roberd spak fulle tite,
"Withouten any essoyne, vengeance salle falle þe not lite.
"Forsakes þou Gode's gyft, þou dos him grete despite.
þus sayd Godfrey of Bolyon, his hert was fulle of site.
Forsoth vengeance he fond, of Criste þe grace he les.
For couetise of þis lond, his mischene he ches.
Of Roberd is no speyre to mak of parlement.
His broþer Henry is heyre of alle his tenement,
Of alle Normundie, withouten geynsayng,
Als heyr of ancestrie, Henry seysed þat þing.
SONE þan was it told vnto þe kyng of France,
þat Roberd lif was sold þorgh treson & mischance.
Whan Lowys herd þat sawe, þat Roberd was so dede,
Ageyn right & lawe, tille Henry he misbede.
For traytours of men Inglis to Lowys þam bond,
þei hight him forto wisse, how he mot haf þis lond.
He trowed to þer conseile, at Douere he gan vp ryue,
It had bien wroþerheile, if he ne had went belyue.
þe kynge's kosyn Thebaut, & Randolf Gobion,
To gyf Lowys assaut, samned at Chilyngton.
Of Wales þei had inowe, þat Sir Lowys gan chace,
& of his men þam slowe, to rest þei had no space.
Vnto þe se side chaced þei Sir Lowys,
He durst not abide, no turne Thebald his vis.
To schip ilkon þei went, fulle on lond leued.
Mot þei Lowys hent, he suld haf lorn his heued.
